飛魚小兄妹備戰渡海泳 11歲妹想學哥哥 做最年輕選手

飛魚兄妹單焯峰（左）同單倩（右）希望今年一齊參加維港泳，兩人志願都係想成為游泳運動員。（李澤彤攝）

【明報專訊】一年一度嘅新世界維港渡海泳今年10月18日(周日)舉行，嚟自東涌嘅飛魚兄妹趁暑假積極備戰，妹妹更加日日操水，想學當年哥哥做賽事嘅「最年輕選手」。

維港泳分為競賽組和優悠組兩大組別，均要求選手喺9月初接受水試，喺45分鐘內游到1500米，兩個組別分別在於競賽組有計時同分名次，但要喺水試中年齡組別中最快嘅100名泳手先可以參加，兩兄妹都以此為目標。

哥哥單焯峰今年14歲，2013年第一次參加維港泳嘅優悠組，當時12歲嘅佢成為賽事中最年輕參賽者之一，今年係佢第三次挑戰維港泳，期望能入年齡組別為12至16歲嘅競賽組。就嚟12歲嘅妹妹單倩一直好羨慕哥哥，但之前一直「未夠秤」唔可以玩，今年首度挑戰維港泳，有望成為今屆賽事最年輕選手，佢仲想越級挑戰參加競賽組𠻹。

兩兄妹自細開始學游水，喺學界同分齡賽事獲獎無數，就喺周日(16日)由康文署舉辦嘅離島區分齡游泳比賽，哥哥拎到一銀一銅，妹妹拎到一金兩銅。

兩兄妹趁暑假得閒啲主動加操練習，哥哥話佢一星期練5次水，每次兩個鐘，妹妹更加日日都操水。至於對賽事嘅目標，哥哥不奢望會攞獎，只係希望成績好過上年，妹妹就稚氣咁話「我要快過單焯峰！」咪睇妹妹咁講，查實佢哋「兄妹同心」，兩個將來都想做游泳運動員。