【明報專訊】香港大學學生會已事先張揚今年「六四」唔派代要去維園，而佢哋噚日公布當晚會留校搞活動，屆時會辦六四座談會，獲邀嘉賓包括1989年派駐北京採訪民運嘅傳媒人謝志峰。謝志峰就對Emily話，既然有人邀請佢講歷史，佢都有責任、義務同學生分享，但謝志峰都話其實大家應該一齊去維園出席集會，話今時今日真係唔覺得要另起爐灶、分散力量。

港大學生會公布，六四當晚7時30分會喺大學中山廣場集會，先有簡單嘅悼念儀式，然後有學術論壇，主講除咗有謝志峰，仲有學生會會長等。學生會時事秘書李顯昇話，佢哋想用自己嘅方式悼念六四，又話唔係同支聯會搶客，反而係互補，等市民可以用唔同角度判斷及分析六四事件對香港人嘅影響。佢又話場地預計可容納1000人參加。

謝志峰就話，既然有學生團體邀請，自己不妨去參加，相信維園少佢一個都無所謂。佢話唔會反對團體辦不同嘅活動，但喺目前咁多爭議嘅時刻，大家集中力量出席六四集會，會比另起爐灶好啲。