財案表決慢吞吞 議員互批
曾鈺成籲注意公眾形象
[2015.05.22] 發表
【明報專訊】立法會噚日繼續表決議員就財政預算案提出嘅近500項修訂，不過成朝嘅會議經常都唔夠法定人數35名，搞到主席曾鈺成要成日響鐘，召喚議員返嚟完成表決程序。建制同泛民議員互數不是，民建聯李慧琼鬧爆泛民出席會議人數比之前答應嘅少，拖長會議，黨友葉國謙話已經同泛民飯盒會召集人、公民黨梁家傑投訴；梁家傑就話同葉國謙無協議，又話建制派要做好「保皇黨」角色，就要有所承擔。
梁家傑否認協議出席人數
曾鈺成話根據以前經驗，一個鐘可以表決約35項修訂，但噚日會議同一時間只可以表決20項修訂，如果再無改善，今日就趕唔切完成表決修訂程序。佢提醒議員唔好再浪費時間，「公眾在睇，議員到底要畀大家一個咩形象，請議員自己考慮」。
李慧琼投訴話，要多次點算人數，始作俑者係發起拉布嘅議員，又話泛民議員之前曾經同意會有至少一半議員出席會議，但噚日明顯唔夠人。不過佢都強調所有議員都有責任開會。
梁家傑就話之前只係知會葉國謙，各泛民黨派都會有更表，避免流會，強調唔係協議，佢話相信議員自己會拿揑。民主黨劉慧卿就話泛民無意拉布，會呼籲議員盡量留喺會議廳，避免會議被拖長。
更多港聞
【明報專訊】年輕人又有好消息喇。特區政府同法國政府達成協議，由於香港/法國工作假期計劃反應熱烈，2015年度名額會由200個增至400個。
...
詳情
【明報專訊】民建聯葛珮帆噚日去信勞工及福利局，建議局方為弱智人士設立自願登記名冊，畀警方同海關等前線人員遇到自稱弱智或者懷疑弱智人士時，可經...
詳情
相關新聞
