【明報專訊】警務處長盧偉聰月初上任後首次訪京成為傳媒焦點，但原來消防處長黎文軒亦同期訪京，喺返香港嘅航機上，兩人又好蹺咁同機，但上機時待遇就有啲唔同。警務處一哥由VIP專車送到機場，仲行VIP通道登機，而消防黎sir就同Emily一齊經普通登記橋登機，黎sir笑笑口話，「一哥」有特別安排，而自己就係「平民」，所以無特別安排，又話自己係部門首長，可以坐商務客位，但佢選擇坐番經濟客位，「費時啦，慳番啲錢」。 盧sir雖有VIP登機待遇，但上到機都係做番「平民」坐經濟艙，同黎sir都隔成幾行位，兩個處長隔空講聲hi，然後就各自「修行」。黎sir之後同Emily吹水，話今次訪京以實務交流為主，帶咗10個前線同事學習水上打撈搜救、大型劇院同古蹟防火等等北京比香港先進嘅技術。 Emily聽聞一哥呢幾日喺北京同公安部交流都有淺酌吓，但黎sir話消防當值期間唔可以飲酒，所以北京消防單位只係招待佢哋喺消防局嘅飯堂食吓家常便飯，無飲酒亦無食北京填鴨。黎sir又話去北京時航機delay咗三粒鐘，好彩無影響行程。 黎sir喺飛機上同Emily無所不談，剛喺北京同記者茶敘完嘅一哥，就想記者尊重佢私隱，婉拒同Emily喺3萬呎高空傾偈嘞。
|
| |
| |
;){kind=small}
;)
