白立方畫廊 展阿嬌落淚短片
【明報專訊】進駐香港近3年嘅英國著名畫廊White Cube(白立方)今日起舉行新展覽,入面仲有一張令人意想不到嘅面孔,就係女藝人鍾欣潼(阿嬌)喇。阿嬌喺短片入面由微笑變成落淚,畫面淒美。藝術家蔣志解釋,幾年前阿嬌捲入艷照風波,一開始有輿論批評佢無喊,蔣志覺得呢啲係外界強加畀佢嘅要求,所以邀請佢拍短片,希望呈現一個完全無背景嘅「哭」,交由睇嘅人自己諗。
專程喺北京來港嘅蔣志同Emily講,拍短片唔係要幫阿嬌平反,而係為所有被「強加意義嘅事物平反」。佢話阿嬌件事發生時,好多媒體好似覺得佢要喊、要道歉,似佢做錯事咁,其實件事係部分人有成見,保守同開放嘅人睇法亦會唔同。短片長約8分鐘,喺2009年完成,叫做《0.7%的鹽》,代表眼淚嘅鹹度。蔣志話邀請阿嬌拍片過程順利,佢剩係同阿嬌講想拍由微笑到喊嘅短片,阿嬌就喺鏡頭前自然流露,無任何剪接。
今次係白立方首次展出亞洲藝術家作品,蔣志同另一名藝術家石青都有唔同嘅藝術品展出。白立方位於中環干諾道中50號,展覽即日起至3月7日免費入場,開放時間周二至周六,上午11點至下午7點。