日本跑手感染 歐耀佳跑渣馬執垃圾
[2015.01.30] 發表
【明報專訊】好動、喜愛運動嘅歐耀佳醫生，剛放低佔中醫療隊任務，轉頭又去參加禮拜日舉行嘅渣打馬拉松，佢近日喺facebook上載照片，見佢一邊跑步、一邊拎住膠袋執垃圾。佢留言話當日跑跑吓，見到一名日本跑手拎住幾個膠袋，邊跑邊將各種垃圾放入膠袋分類，令佢好感動好敬佩，所以學日本跑手咁做。
歐耀佳話當日跑咗25公里，已追上早過佢出發嘅太太，於是陪佢跑一段，出咗長青隧道後，跑全馬同跑半馬參賽者分開，跑道上好少人，亦無乜工作人員，有好多參賽者用完嘅膠水杯、膠雨衣、能量補充劑嘅包裝紙就扔喺馬路，佢於是一邊跑一邊執垃圾。
更多港聞
相關新聞
