盈盈或要回鄉洞房 樂樂留港捐精

[2015.01.22] 發表

【明報專訊】海洋公園嘅大熊貓盈盈同樂樂，喺香港已經有4年行房經驗，但仲係膝下猶虛，今年要加入全國大熊貓繁殖計劃，盈盈可能要北上洞房，首胎會自動成為港B。若盈盈真係上去另覓佳偶，咁樂樂就要「獨守空房」、留港捐精，而佢嘅血脈有去無回頭，注定要做大陸B。

單數胎歸香港雙數歸大陸

盈盈樂樂家陣已經9歲，佢哋點樣繼後香燈引起關注。3月開始就係佢哋嘅發情期，海洋公園話暫未定幾時同全國大熊貓配對，初步計劃會將樂樂嘅精液送去四川，而盈盈就有兩個選擇，除咗將四川雄性熊貓精液送來港同佢人工授孕，亦有機會將盈盈送去四川自然交配。

若盈盈真係返鄉下，咁洞房後一個月至可以返港安胎。無論佢用乜嘢方法懷孕，佢生嘅一、三、五等單數胎，會歸香港所有，而二、四、六等雙數胎，則歸大陸所有。

樹熊3月底登場

至於同熊貓一咁可愛嘅樹熊，最快3月底就同大家見面，3隻樹熊從南澳洲來港後適應得唔錯，但為免過年太多人嚇親佢哋，樹熊館要遲少少至開。

海洋公園或推Wi-Fi

海洋公園舊年1至12月有780萬人次入場，按年升4％，但人均消費少咗，按年減5％，因為9至10月受佔中影響，無論大陸同外國自由行都少咗，拉低咗消費額。園方今年要再搞新意吸客，暫計劃第二季起喺部分設施試推Wi-Fi，同步仲會出App搞fast pass。

更多港聞