蜜運馮煒「光公器私用」
論壇舌戰 話「結婚會忠誠」

新聞統籌專員馮煒光以「個人身分」出席《城市論壇》，蜜運中嘅佢喺節目中不時微笑，仲乘機讀出愛的宣言。（盧翊銘攝）

馮煒光話要保護女友，唔肯同大家分享佢哋嘅相，但就向Emily傳來兩樽水果相，話係女友整嘅，以慰勞佢噚日喺《城市論壇》同人舌戰喎。（馮煒光提供）

【明報專訊】曾自比「白宮發言人」嘅新聞統籌專員馮煒光，噚日以「個人身分」出席港台《城市論壇》，會上當大家談及中港關係時，港大學生會刊物《學苑》嘅前副總編輯王俊杰形容中港關係為「指腹為婚」，即盲婚啞嫁喎，仲向馮煒光挑機，「如果要你同(民建聯議員)蔣麗芸結婚，要你義無反顧愛護佢，你肯唔肯？」蜜運中嘅馮煒光就乘機讀出愛的宣言，話「我同任何人結婚都會好忠誠」。

女友圈外人 識於九型人格堂

曾經同人講過感情生活「好dry」、驚自己變「天煞孤星」嘅馮煒光同Emily講笑，話女朋友有睇《城市論壇》直播，所以乘機「公器私用」，講句「同任何人結婚都會好忠誠」，唔通想趁機向女朋友暗示想結婚？

53歲嘅馮煒光之後仲透露，佢同女友係喺上九型人格堂時認識嘅，話大家好夾。佢又透露自己係第八型人格，即係「領導、保護型」，難怪每當記者問起女朋友嘅事，佢都會「保護」女朋友，講明佢係圈外人囉。

其實噚日節目完咗，一眾記者都追問馮專員幾時同女友拉埋天窗，佢笑笑口無答，淨係話擺酒一定會請記者去喎。馮煒光又話女朋友係圈外人，費事嚟到論壇會嚇親，仲大讚女朋友玩滑翔傘好叻，講笑話係靠飛上天空先識到佢。

更多港聞

居港埃及學者 出六四小說

【明報專訊】柯士甸路「六四紀念館」噚日舉行小說Closed Gate新書發布會，故事講述一個巴勒斯坦留學生對中國八九民運嘅感受，以天安門比對... 詳情

渣馬跑手 發起噓一哥

【明報專訊】嚟緊周日（1月25日）舉行嘅渣打馬拉松，邀請咗政務司長林鄭月娥同警務處長曾偉雄為42公里全馬賽事「鳴槍」，主持起跑儀式，一班資深... 詳情

青協1蚊舖租助青年創業開食肆

【明報專訊】《施政報告》剛剛先話要幫青年創業，話咁快就有人願意幫手，透過香港青年協會借出佐敦一間地舖，話畀年輕人創業搞食肆，月租只需要1蚊，... 詳情

智障人士馬拉松 陳茂波「陪跑」

【明報專訊】「香港賽馬會特殊馬拉松」噚日喺啟德郵輪碼頭舉行，有3000人參加，包括主禮嘅發展局長陳茂波（中）、馬會副主席周永健及社會福利署長... 詳情

周身刀學生嚴重濕疹當磨練

【明報專訊】小六生葉浩民自小受嚴重濕疹影響，整天痕癢，手指連拿筆寫字也會痛，彈結他時亦會因皮膚乾燥而手指流血，就算化妝演話劇也會致濕疹惡化。... 詳情