【明報專訊】早排正生書院向禁毒處申請5000萬元撥款，喺芝麻灣起3間臨時屋，改善學校嘅住宿同教學環境，但工程費至少都6500萬元，仲差1500萬元。「全城街馬」噚日公布，10月4日舉辦慈善山野賽為正生籌款，希望籌到700萬元，加起正生之前籌到嘅800萬元，就啱啱夠1500萬元。

建3臨時屋 工程費要6500萬

慈善山野賽分兩個組別，一個係由沙田城門水塘跑到大帽山扶輪公園，全長16公里；另一個由西貢北潭涌起步，同樣跑到大帽山扶輪公園，全長57公里，仲長過42公里嘅馬拉松全馬賽事。街馬今日起可以喺網上報名，16公里同57公里組別嘅報名費，分別係850元同950元，當中至少有500元會捐畀正生。

正生書院校長陳兆焯同Emily講，會派2隊學生同1隊老師參加57公里賽事，𠵱家師生每隔兩日就為賽事練跑，陳校長話，希望有善長可以贊助佢哋，善長出錢，佢哋出力。

陳校長又話，近日有善長主動提出，全額資助前正生學生呂榮豪喺中大讀運動科學與健康教育課程嘅學費，校長話社會有好多有心人支持正生，好感激佢哋。