【明報專訊】噚日工聯會同「愛港之聲」分別舉行「反暴力、反拉布」遊行同反佔中撐警大遊行。無綫新聞訪問咗一個參加工聯會遊行嘅女士，唔知係太緊張定係「身在曹營心在漢」，佢竟然對住鏡頭笑稱係支持政府同「支持反中央」，後來有人提水，佢先改口話係「反佔中，一時唔記得咗」。不過，佢之後又疑講錯「幫港出聲」召集人周融嗰名，話「我支持『張融』嘅和平方案」。但無綫喺噚日下午已經刪咗呢個街訪嘅片段喇。

淨心濕身揮旗 拒男士撐傘

另外，久未露面嘅「愛港行動」召集人陳淨心好畀面參加「愛港之聲」舉辦嘅撐警大遊行，仲要手持國旗，「走在最前」擔任旗手。淨心BB一見到記者影相，唔止企定定微笑，仲不斷叫大家「唔該影得我靚啲」。遊行途中突然落起大雨，唔少男士都上前為淨心BB撐傘，但都被佢推開。淨心BB不惜全身濕透都要喺大雨下揮動國旗。