【明報專訊】近排港人成日講普選，呢兩年無綫推出嘅「一人一票選港姐」活動自然吸引唔少注意力，有別去年選到中途系統故障，喺周日港人終於成功有份選港姐嘞，冠軍係由有17萬市民支持嘅陳凱琳(Grace)當選。按傳統，港姐冠軍都會喺當選翌日接受新聞部訪問，講講抱負呀咁，今年記者及港姐就講到普選，Grace建議政府及特首多聽市民意見。訪問喺噚日午間新聞同24小時新聞台播放，未見喺晚間6點半新聞時段播放，但11時晚間新聞就有播。 午間晚間有播 6點半新聞無影 點解今屆港姐訪問未喺6點半新聞播放呢？Emily噚晚兩度致電無綫新聞及資訊部總監袁志偉查詢，至截稿時未獲回覆。不過，呢段短片噚日就喺網上瘋傳。 Grace係大學畢業生，喺加拿大長大，Emily喺TVB網站睇番訪問，記者問到特首應否全民投票選出，Grace就好得體咁話選特首係「比較複雜的議題」，但留意到社會多咗要求普選特首嘅遊行，認為政府應多聽民意。 作為美貌與智慧並重嘅港姐，Grace講到作為特首「都唔會想人人針對你、反抗你」，建議做啲嘢聽吓民意，「有個environment(環境)係安全可以畀我哋表達到意見 ，而你又真係聽我講」。
|
| |
| |
;){kind=small}
