【Emily】試食清真中菜 鄭泳舜讚一舉兩得
[2025.02.01] 發表
【明報專訊】近年本港銳意吸引穆斯林國家嘅遊客來港，民建聯立法會議員兼該黨少數族裔委員會主席鄭泳舜同旅遊界議員姚柏良日前亦獲旅發局邀請，去到本港首間獲香港回教信託基金總會(BOT)頒發「清真友善餐廳」認證嘅高級中菜餐廳試食，所有菜式都無用豬肉、豬油等。鄭泳舜覺得菜式既可滿足穆斯林旅客需求，仲可以向佢哋推廣博大精深嘅中菜文化。
民建聯嘅少數族裔委員會噚日仲上載介紹清真餐廳嘅影片，由副主席莊展銘同少數族裔代表去唔同級別嘅清真餐廳「搵食」，其中去咗灣仔一間獲第一級別認證嘅粵菜餐廳，即係只會準備同提供清真食品，而呢間粵菜餐廳就將點心常用嘅豬肉換成雞肉。
鄭泳舜話，餐廳要獲得認證嘅過程相當嚴謹，對菜式設計、廚具都有要求，佢期望旅發局繼續推動同協助更多餐廳申請認證。
更多港聞
相關新聞
