【Emily】珠海設港跨境通辦自助機 提供11部門70政務服務
[2024.08.24] 發表
【明報專訊】數字政策辦公室噚日公布喺珠海設置香港「跨境通辦」自助服務機，方便身處大灣區內地城市嘅居民同企業，毋須親身到港就可以申辦香港嘅政務服務。自助服務機放喺珠海市民服務中心一號樓三樓綜合服務廳，隔籬仲有「智方便」自助登記站，市民到時可直接辦理「智方便+」登記同升級手續。
「跨境通辦」自助服務機之前已喺廣州、深圳前海同福田設置，部機現時提供11個政府決策局、部門同有關機構約70項政務服務，涵蓋企業同市民常用嘅服務範疇，包括稅務、公司註冊、物業同車輛查詢與登記、個人證明文件，仲有人才入境申請、福利及教育、醫療健康、出入境檢查及緊急求助、文化及旅遊。市民可以通過自助服務機輸入資料、掃描文件同列印結果，一站式處理申辦手續。
數字辦發言人話會繼續與廣東省政務和數據局商議，喺更多大灣區內地城市設置「跨境通辦」自助服務機及「智方便」自助登記站。
更多港聞
相關新聞
