【Emily】代特首赴法國國慶酒會 財爺：財赤都唔會再徵葡萄酒稅
[2024.07.13] 發表
【明報專訊】法國駐港澳總領事館噚日舉行法國國慶酒會，原本擔任主禮嘉賓嘅特首李家超要上廣東省出席粵港合作聯席會議，改為預錄視像致辭，再加財政司長陳茂波親身出席，顯示政府重視同法國嘅關係。陳茂波話，法國酒佔所有外地入口香港嘅酒品貨值約六成，可見港人幾咁鍾意法國酒。佢笑住咁派定心丸，話雖然政府面對財赤，都唔會重新開徵葡萄酒稅，繼續歡迎法國人嚟香港，無論經商、文化或飲食，希望兩地未來繼續更多合作。
李家超喺視像致辭話，仲有兩個禮拜巴黎奧運就開幕，期待港隊喺法國世界級場地會有精彩表現。法國駐港澳總領事杜麗緹(Christile Drulhe)就用廣東話為港隊打氣：「香港運動員加油！」又話加強商貿同文化合作，符合法國同香港嘅共同利益，希望繼續同港府齊手創造發展關係嘅條件。
剛率團去完海南嘅外交部駐港公署特派員崔建春、前特首林鄭月娥，同至少10個立法會議員都有出席酒會。
更多港聞
【Emily】立會午間音樂會 議員忙裏偷「聽」
【明報專訊】立法會噚日舉行多場活動，中午先有午間音樂會，由音樂兒童基金會喺立法會大堂舉行弘樂演奏（圖），包括多首古今樂曲Brandenbur... 詳情相關新聞
