【Emily】T4路撥款闖關前 林世雄放13日假
[2024.04.20] 發表
【明報專訊】政府早前撤回造價71.6億元嘅沙田T4主幹路工程撥款申請，有消息話政府將輕微下調開支，下月初再提交立法會財委會審議。Emily留意到，喺「闖關」之前，運輸及物流局長林世雄噚日起休假13日，放埋五一勞動節之後，5月2號復工，翌日就係財委會開會。
雖然放假近兩周好似幾耐，不過Emily翻查紀錄，其他局長都試過放長假。根據政府憲報，本屆司局長合共放咗99次有署任安排嘅休假，其中7次連續放假多於10日，涉及3個政策局長，當中商經局長丘應樺去年12月放咗17日假(連同公眾假期)。
Emily按憲報資料統計，自2022年上任以來，放假日數最多嘅司局長係勞福局長孫玉菡，合共56日，以身作則顯示勞動同休息同樣重要；其次係財庫局長許正宇放咗55日，林世雄就放咗54日；房屋局長何永賢上任首年就成日返半日放半日，之後就較多放連假。
更多港聞
【Emily】廟街夜市延長半年 次輪宣傳再搵尹光
【明報專訊】旅發局去年12月中喺廟街設置夜市攤檔同打卡藝術裝置，噚日宣布項目延長半年，至今年12月，同時推出第二輪宣傳，再次邀請「廟街歌王」... 詳情相關新聞
