【Emily】民建聯宣傳走塑 搵議員扮茶記食客
[2024.04.05] 發表
【明報專訊】首階段即棄膠餐具管制措施今個月22號實施，禁止餐廳向堂食顧客提供膠飲管、刀叉等9類即棄膠餐具。民建聯噚日喺facebook幫政府宣傳，搵咗黨內兩個立法會議員顏汶羽同陳永光，再加埋沙田區議員董健莉同楊英瀚一齊拍片。
顏汶羽、董健莉同楊英瀚喺片入面扮茶餐廳顧客，想要膠餐盒打包食物，陳永光就以「老闆」身分登場，淨係畀咗膠盒，但就無畀膠餐具。顏汶羽隨即解釋，話即棄膠餐具管制即將實施，到時發泡膠做嘅餐具都唔可以再提供，仲提醒同枱嘅楊英瀚手中嘅膠牙籤都無得提供。顏又話「走塑」係為咗下一代，亦係香港環保史上一個里程碑，希望市民一齊支持「走塑」。
帖文有畀埋管制計劃專題網站「截塑」嘅連結，網站入面有計劃嘅相關資訊，例如邊啲產品會被禁，同埋膠餐具替代品嘅資訊等。
更多港聞
【明報專訊】1990年4月4日，全國人民代表大會正式通過香港特區《基本法》，相隔34年，立法會早前亦完成為基本法23條立法。基本法委員會委員...
詳情
相關新聞
