【Emily】豎立22年 杏花邨站外女神鐘像清拆
[2023.10.07] 發表
【明報專訊】豎立喺港鐵杏花邨站外22年嘅一座女神像鐘上月被清拆，杏花新城最後一個歐陸式地標隨之消失。港鐵回覆Emily話，女神像鐘柱喺2001年杏花新城翻新嗰陣設置，上月超強颱風「蘇拉」襲港，鐘柱嘅女神銅像同柱身被風吹到多處損毁，無法修復，同月將整座鐘像拆卸，嗰個位會擺放其他設施。
原名杏花邨中心嘅杏花新城早喺1987年落成，係港鐵杏花邨站上蓋項目，當時仲未有歐陸式設計，直到2001年商場全面翻新同改名後先出現。翻新後嘅杏花新城行「古典設計風」，以歐洲文藝復興時期為主題，四周放咗各種雕像，最特別嘅係地下嘅「魔力噴泉」，拖住噴泉入面兩個小天使嘅手就會播音樂。2016年商場再度翻新，東翼變成運動用品outlet，亦陸續拆除古典設計裝飾。
今次移除女神像鐘意味商場嘅歐陸式地標徹底消失，Emily前日經過，原本擺放鐘像嘅位置已被鐵欄圍封，至於之後會放咩，港鐵就話會同「相關社區持份者」溝通。
更多港聞
【Emily】匡智會松嶺村擴建完 服務額：200變1100
【明報專訊】馬會喺2014年透過慈善信託基金向匡智會撥捐6億元，支持匡智會位於大埔松嶺村嘅擴建工作。松嶺村係專為智障人士服務嘅復康中心，擴建... 詳情相關新聞
