【Emily】青聯拉隊去海南 「專心」諗大計
[2023.10.06] 發表
【明報專訊】香港青年聯會成立咗31年，組織核心中有唔少富二代、政二代，疫情過後青聯都搞番好多交流及活動，噚日就同傳媒飯敘講吓工作計劃。青協秘書長麥融斌同Emily講，以往青聯有搞集思會，但因疫情停咗幾年，青聯已定咗喺10月27至29日，拉100多人大隊去海南島搞集會，大家撞吓青聯發展大計，又趁機大家增進認識。至於點解去到海南島，唔近近哋去深圳，麥融斌講笑話，大家困喺海南島，可以專心啲開會。
青聯主席楊政龍係英皇集團楊受成嘅仔仔，楊政龍都不諱言，青聯領導層有唔少富二代、政二代，但佢哋都有落力落腳去地區工作，例如疫情期間派物資、開街站。佢又講開青聯喺灣仔營運由酒店改裝而成嘅青年宿舍，話項目近100個單位，好受青年歡迎，佢哋做過調查，大部分租客都喺青年宿舍附近返工，有唔少直情係行路幾分鐘就到公司，慳番唔少時間及車費。
更多港聞
【Emily】何敬康「25歲牛一」 新民黨友驚喜慶生
【明報專訊】新民黨立法會議員何敬康（Adrian，左三）噚日生日，黨主席葉劉淑儀（右三）十分有心，同黨友前日同佢提早慶生。Adrian話，太... 詳情
相關新聞
