【Emily】房委會盃三人籃球賽 何永賢有進帳
[2023.08.21] 發表
【明報專訊】香港房屋委員會慶祝成立50周年，噚日喺葵涌石籬(二)邨嘅籃球場舉行「房委會盃」三人籃球挑戰賽，房屋局長何永賢、副局長戴尚誠同新上任嘅常任秘書長羅淑佩，以一身紅色波衫現身球場為球員打氣，正副局長仲同佢哋鬥射籃。
羅淑佩去充氣籃球前「打卡」
何永賢同其他官員一身波衫波鞋，羅淑佩去到充氣籃球面前「打卡」，動作多多。何永賢、戴尚誠同年輕球員一齊射籃，每人有兩次機會，年輕球員開頭一球都唔入，輪到何永賢，好易就入咗一球，戴尚誠都有一球進帳，主持人笑笑口話要靠局長嚟追分。
何永賢噚日致辭時話，好耐冇攞起過籃球同射籃，又話見到好多屋邨嘅籃球精英，感受到青春活力。第一次出席房屋局活動嘅羅淑佩就話，好開心加入房屋局呢個大家庭。
更多港聞
相關新聞
