【Emily】通關料客增 海洋公園請350全職

【Emily】通關料客增海洋公園請350全職

[2023.01.31] 發表

【明報專訊】本港與內地通關及高鐵復運，海洋公園預料來港入園旅客逐步增加，園方及水上樂園話將合共招聘350個全職職位，包括250名前線員工，涵蓋餐飲、零售、設施營運等，同100名後勤。

海洋公園人力資源部主管林美瓊話，動物保育及機動遊戲設施為該園獨有，外面未必有相關工作培訓，園方會安排員工接受內部及專業培訓。佢話員工服務水平達標有晉升機會，如機動遊戲操作員，園方要求員工完成30小時培訓，學習操作一個機動遊戲，培訓後有考試，通過者有資格自行操作遊戲；若入職滿6個月、考獲3個相關遊戲操作牌照，會獲升職機會。

入職15年嘅遊樂設施執行部區域經理朱永曦話，園方經常有不同嘅新機動遊戲及政策推出，畀佢有更多機會挑戰新事物，自己喜歡玩機動遊戲，令佢更有動力繼續工作。

園方話，求職者可於每周四到園方即場面試，或網上遞交申請。水上樂園聯同勞工處及救世軍，聽日(周三)喺救世軍油麻地青少年綜合服務中心舉辦「水上設施服務大使∕營運專員培訓計劃招聘日」活動。