【Emily】客串家務助理 黃國嘆殊不簡單
[2022.12.31] 發表
【明報專訊】仲有3星期就到農曆新年，好多人已準備大掃除，工聯會理事長黃國(圖左)噚日去搵家居服務從業員協會會員工友，仲著住圍裙、帶埋膠手套，去到一個屋企落手清潔，佢話間屋雖然無陳年漬，但好似吸塵、抹地、抹窗呢啲看似手板眼見工夫嘅工作，原來殊不簡單，清潔一間屋既要講體力亦要講技術，「專業的事都是交由專業處理」。
黃國話，同家務助理工友傾計時知道，有時會遇到啲千年油漬、厚厚霉菌、頑強污垢等，但佢哋自有竅門同編排工作嘅流程，再用唔同嘅打掃工具和清潔劑，工作就更得心應手，例如清除器皿上嘅污漬要先浸泡半小時再清洗，牙膏亦有潔淨功能，用嚟洗水龍頭仲會閃令令。黃國仲乘機宣傳有家務助理轉介服務嘅樂活一站同家居服務從業員協會，等一班家務助理掙啲外快，用努力換取生活。
更多港聞
相關新聞
