【Emily】李家超小學母校4生同特首做筆友
[2022.12.24] 發表
【明報專訊】特首李家超嘅小學母校、深水埗五邑工商總會學校早前舉辦「我和特首交筆友」嘅活動，揀咗4個學生寫信畀特首，分享生活點滴。學校噚日喺facebook提到，李家超星期一(19日)回聖誕卡畀4個同學仔，親筆寫低祝福說話。
校長黃錦耀同Emily講，活動由特首辦主動發起，希望聯繫李家超嘅師弟妹，形容李「有心、念舊」。校長話，學校大約9月公布活動，有意參加嘅同學需要遞交自薦信，反應熱烈，校方最後主要挑選咗幾個小六同學參加，同學仔喺信中除咗分享日常生活，亦有就施政報告提出意見。
黃校長話，特首回信當日正值學校聖誕聯歡會，同學仔收到聖誕卡都非常雀躍，對呢張「不一樣的聖誕卡」珍而重之。校長仲話𠵱家大家無咩機會寫信，活動可以訓練同學仔嘅寫作能力，亦可以鍛煉時事觸覺等，而4個同學仔日後會繼續寫信畀特首，可能講下恢復全日制、聖誕假期嘅生活點滴。
Emily睇翻學校facebook啲相，見到特首鼓勵同學仔「努力學習、不斷求進」，希望同學仔可以成為對社會有用嘅人。
更多港聞
相關新聞
