【Emily】環署聲學相機迅速搵到噪音源頭
[2022.10.01] 發表
【明報專訊】噪音惹人心煩，仲可能影響健康，環保署近年引入「便攜式聲學相機」，早前喺處理一宗投訴時迅速搵到噪音源頭，開頭以為係嚟自投訴人對面大廈嘅天台，環保署翌日再用聲學相機查探，證實噪音原來源自投訴人所住大廈嘅高層。環保署解釋聲學相機嘅原理，話相機配備過百枚咪高峰收音，憑聲波抵達時間嘅差距同強弱程度等計算聲音源頭，搵出噪音位置同強度，一般半個鐘內可以搵出噪音源頭，較傳統調查方法更有效率。
另外，地政總署噚日公布新版本「三維行人道路網數據集」已開放畀市民免費使用，新版嘅覆蓋範圍擴展至郊野公園主要行山徑同鄉村主要行人道，公眾可以估算行山難度同規劃路線。道路網亦提供鄉村社區同埋公共交通設施嘅路線資料，例如遊樂場、村公所、公廁、巴士站同碼頭等。
更多港聞
【Emily】萬朵玫瑰賀國慶 鄧炳強：青年係國家未來
【明報專訊】「新家園協會」同香港、廣州、澳門合共50多個團體噚日合辦《萬朵玫瑰賀國慶暨多元文化青年音樂會》，慶祝國慶，保安局長鄧炳強（台上右... 詳情相關新聞
