【Emily】皇后像廣場花燈 紮作大師伙在囚者製作
[2022.06.25] 發表
【明報專訊】下星期係香港回歸25周年，各區都有好多慶回歸擺設，中環皇后像廣場嘅巨型花燈，就畀建築師黎雋維批評冇中式設計嘅韻味同優雅。Emily聯絡到花燈嘅設計人，原來花燈係由紮作大師夏中建伙拍在囚者一同製作，規模更打破世界紀錄。
夏中建作品 打破世界紀錄
花燈係香港道教組織「通善壇」、懲教署、康文署同中西區民政事務處合作項目，紮作大師夏中建設計，高13米、闊9米，打破巨型吊掛花燈世界紀錄，展期由6至10月，以慶祝回歸25周年。懲教署就話，夏中建早前透過面授同視像方式，教授青少年在囚者同受監管者製作部分花燈組件，懲教署資助內地學校嘅學生亦有一同設計花燈。
「通善壇」同Emily講，花燈有過千年中華文化，係非物質文化遺產，審美標準同建築唔同；從事紮作行業逾40年嘅夏中建，設計同製作要考慮花燈承受風雨能力，絕對唔容易。「通善壇」又話，喺中環呢個石屎森林，能夠擺放中式花燈，對比更加鮮明。
更多港聞
相關新聞
