【Emily】李家超政綱 「我」少過林鄭150次
[2022.04.30] 發表
【明報專訊】李家超噚日公布參選政綱，不論字數、頁數或佢本人出現喺配圖嘅次數，都較過往兩屆特首林鄭月娥同梁振英嘅政綱少(見表)。中大政治與行政學系高級講師蔡子強認為，李家超競選準備嘅時間，較林鄭月娥同梁振英參選時少，因此政綱較為簡單、籠統，觸及嘅範圍亦較小。
薄過林鄭CY 未提人權民主
李家超嘅政綱有約9100字，共32頁，提出4個綱領。Emily盤點咗三屆候選人政綱嘅關鍵字(見表)，喺政策上，李家超提出「發展」次數最多，有81次，但仍然唔及林鄭月娥同梁振英。佢嘅施政方向提出「以結果為目標」，但喺政綱只談及訂立關鍵績效指標，「指標」出現次數亦唔及梁振英。而警隊出身嘅李家超，政綱未曾提及「國家安全」四字。
至於價值同其他用字，佢亦未提及「人權」、「民主」，反而「法治」提及次數較前兩屆多。多次強調建立「我和我們」文化嘅佢，提及「團結」11次，提及「我」則遠比林鄭月娥嘅173次為少。
蔡子強話，觀乎噚日媒體以「解決跨代貧窮試驗計劃」等作為政綱亮點，話呢啲政策換轉喺施政報告，只會係較「濕碎」項目，而正常嘅選舉，候選人唔想向對手示弱，一定唔會咁樣提政綱。不過，蔡子強認為，咁或者反映李家超唔想寫得太詳細，為日後訂立工作指標留有彈性。
更多港聞
【Emily】警察fb《警聲直播》 小編戮力讚同袍
【明報專訊】「香港警察」facebook《警聲直播》前晚介紹反恐特勤隊（CTRU）工作，邀請隊員現身分享，仲示範點樣近距離搏擊制服疑犯，香港... 詳情
【明報專訊】司法機構噚日宣布委任資深大律師黃佩琪同陳政龍，做高等法院原訟庭特委法官，任期2022年5月1日生效，為期3年。
現年49歲...
詳情
相關新聞
