【Emily】顏汶羽囝囝患川崎症 每次抽完血變樹熊
[2022.04.18] 發表
【明報專訊】民建聯立法會議員顏汶羽上年成為新手爸爸，𠵱家阿仔約9個月大，原來BB喺上年立法會選舉前入咗醫院，留醫咗成個月。顏汶羽噚日喺facebook寫咗段文字畀阿仔，「您病病係(喺)醫院一個月，爸爸仍然係(喺)街頭做好每件選舉工作，應對每件民生大小事。雖然每日爸爸只能見您一陣，但您很勇敢，做左(咗)好多不同嘅檢查，爸爸還記得您每次抽完血要扭抱抱的喊聲，和像樹熊般緊抱著我的感覺！」
顏汶羽同Emily講，阿仔患咗川崎症，之前一直發燒，搵唔到原因好擔心，後嚟搵到位專科醫生先確診到。選舉時每日都好忙，汶羽話太太好勁，BB入院嗰個月要24小時喺醫院陪住，堅辛苦。
汶羽喺fb話做咗立會議員後要籌組辦事處，要學習議會工作同程序，仲遇上第五波新冠疫情，每日奔走不同社區；而BB除咗打針同覆診外仲未試過去街街。汶羽話，每次返屋企，阿仔無論係瞓咗定玩緊都會望一望佢；每晚最鍾意就係瞓喺爸爸大髀度睇電視，臨瞓又要捉住佢嘅手。
更多港聞
相關新聞
