【Emily】反修例中槍「熊仔餅」再入院瘦到40幾公斤
[2022.04.05] 發表
【明報專訊】2019年11．11大三罷，被稱為「熊仔餅」嘅周柏均(圖)喺西灣河中槍，之後經常進出醫院，佢前晚就喺facebook講近况 ，透露上個月因為傷患後遺症兩次入院，分別留醫5日，其間唔可以飲食，令佢再次「暴瘦」，體重跌至40幾公斤。佢話住院時「個心喺度諗究竟點解咁耐都未好返，究竟要折磨到我幾時」，覺得好辛苦，希望「放過」佢。
「熊仔餅」話，個幾星期前出院時精神狀態非常差，幾乎每晚都瞓唔到覺，又要插住喉；休息過後精神好番啲，但最近兩次頻密入院令佢元氣大傷，更易暈易攰。佢仲要做好多覆診治療，不禁話呢段路程相當折磨，並感謝各位支持。至於佢同另一男子被控企圖搶劫等3罪案件，因喺第五波疫情下法庭停擺，聆訊要延到5月26日再續。
更多港聞
相關新聞
