【Emily】解疑兼打針 無國界醫生助長者劏房戶
[2022.03.11] 發表
【明報專訊】第五波疫情確診數字仍然高企，政府正諗辦法提高長者接種率。為支援抗疫，無國界醫生(香港)上星期六同社區組織協會(SOCO)合作，派出醫生向獨居長者、劏房戶提供健康諮詢服務，解答佢哋對打疫苗嘅疑問，亦安排診所現場接種科興疫苗。
有份幫手做健康諮詢嘅無國界醫生(香港)董事局成員李威儀醫生同Emily講，佢當日所睇嘅約30個個案中，一半人本身擔心接種風險，但接受評估後即場打針。
李醫生話唔少獨居長者話有長期病患、曾患癌症、食開藥，擔心身體唔適合打針，驚出現神經功能受損，甚至癌症復發。李醫生話留意到唔少人資訊混亂，佢就講解番香港接種數字同埋死亡率，交畀參加者自己選擇打唔打針。佢話嚟緊嘅周末會再同SOCO安排服務，主要邀請無家者出席，亦會派發快測套裝同教佢哋用。
更多港聞
相關新聞
