【Emily】梁文廣染疫 第3名議員中招
[2022.02.26] 發表
【明報專訊】新冠病毒疫情嚴峻，有第3個立法會議員中招，西九新動力立法會議員梁文廣前日接受鼻咽拭子採樣檢測，噚日收到檢測結果初步陽性。
梁文廣喺facebook話，繼續同家人喺屋企隔離，身體暫無大礙，會繼續維持在家工作。佢同Emily講，現時留喺房隔離，又話知道自己日日跑社區幫手抗疫等都算高危，由於病毒對細路影響大，所以早一排已經將小朋友交咗畀外父外母暫時照顧，所以呢件事都算好彩。佢話自己打咗3針，兩星期無返立法會大樓，前日下晝發燒，發咗一晚，噚日已退燒，仲有少少喉嚨痛。
梁文廣話，上星期初已安排辦事處同事輪流在家工作，近日所有曾經同佢因工作接觸嘅同事亦會即日起在家隔離及接受檢測。為確保安全，佢會為辦公室消毒清潔。
梁文廣之前，民建聯黃俊碩同工聯會麥美娟已先後中招。立法會噚日公布同立法會相關嘅感染個案有5宗，除咗梁文廣，亦包括民建聯陳克勤嘅職員，克勤話自己快速檢測陰性，會自我隔離並在家工作。
更多港聞
【Emily】九龍城區議員左滙雄仔女 打針喊晒口
【明報專訊】九龍城民政事務署噚日聯同區內主要地區委員會及機構，為3歲以上急需疫苗保護嘅人接種科興疫苗。是次接種活動涵蓋唔同年齡層，從幼兒園學... 詳情相關新聞
