【Emily】缺席4月 北區區議員黃凱盈DQ
[2022.01.08] 發表
【明報專訊】民主派區議員去年接連因為宣誓問題被DQ或辭職，而民主黨北區區議員黃凱盈(圖)一直未有宣誓，政府噚日刊憲公告，黃凱盈自去年8月31日起連續缺席北區區議會所有會議，亦冇喺喪失資格限期完結前取得北區區議會嘅同意，所以根據《區議會條例》，黃凱盈今年1月1日喪失議員資格，佢嘅議席同日起懸空。
上周宣布離港 「為孩子學正確歷史」
黃凱盈前年曾經參與過民主派新界東初選，排喺民主黨林卓廷名單第二位。佢因為曾提出未能出席區議員宣誓嘅理由，並要求另作安排，所以雖然未宣誓，之前都未被DQ。佢又曾以身處Omicron病毒高風險地區為由，申請缺席北區區議會會議，但遭區議會拒絕。黃凱盈上周除夕喺facebook宣布離港，「為孩子將來能學習正確歷史，能自由發問，我唯有選擇離開這個熟悉又陌生的香港」。本報曾聯絡黃凱盈，至截稿前無回覆。
黃凱盈喺2019年區選參選粉嶺市選區，以2761票擊敗獲1830票嘅主要對手彭振聲當選。
更多港聞
【明報專訊】民政事務局長徐英偉因為參加人大代表洪為民嘅生日會，被列為密切接觸者，要隔離檢疫。喺生日會翌日同徐英偉同枱食飯嘅新思維狄志遠，前日...
詳情
相關新聞
