【Emily】時候到了 在囚尹兆堅聖誕節領洗
[2021.12.25] 發表
【明報專訊】因為去年六四非法集結案罪成判囚10個月嘅民主黨尹兆堅，聖誕前夕傳來獄中書，除咗祝願大家借助信仰克服當下低氣壓，佢亦透露自己會喺聖誕節領洗。
尹兆堅嘅facebook上載佢嘅獄中書同自繪聖誕卡(圖)，透露自小讀天主教學校，由小學至中學都有上聖經堂，出嚟社會做嘢後亦先後兩次參加慕道班，但一直因為種種原因冇完成，從未決心領洗。可能係信德未夠、可能係未到時候，阿尹直言靈性上唔夠堅定。
終於，時候到了。阿尹話判囚初期，陳日君樞機同一班牧者送嚟嘅聖經同天主教讀物，成為佢喺獄中嘅精神支柱，陳樞機更加每隔一周至10日去探監，每次都同佢講道，最關心係佢讀天主教教理嘅進度。
阿尹話喺呢段人生最艱難時期，信仰令佢克服種種困難，重新振作，同時明白承受苦難嘅意義，守住信念同初心。
陳日君探監講道 關心讀教理
當有一日陳樞機問佢：「安排你聖誕節期間領洗好嗎？」阿尹嘅回應係：「好！我已準備好了。」搵到心靈嘅歸屬，身在囚牢嘅阿尹話：「今年的聖誕，我很快樂。」
更多港聞
相關新聞
