【Emily】請食肯德基 張欣宇拜李月民為師
[2021.12.18] 發表
【明報專訊】立法會新界北候選人、香港新方向張欣宇獲多名重量級人馬支持，原來佢月前仲向資深建制地區人士、元朗前區議員李月民拜師。非建制派嘅元朗前區議員李煒鋒前晚喺facebook上載一張短訊截圖，內容係李月民叫嘉湖街坊投票支持徒弟張欣宇，李煒鋒留言揶揄「大家知咩料啦」。
李月民向Emily承認個信息係佢發出，話個多月前張欣宇喺肯德基快餐店請佢飲茶拜師，又話唔理張係咪建制派，大讚對方對社區問題、政策有自己見解，想喺社區問題上拜佢為師，佢認為張有心，所以先肯收佢為徒。
李月民話兩人都係識咗幾個月，個多月前張向佢請教地區問題，傾傾吓決定拜師。佢又話，始終喺同街坊接觸、屋苑管理，以至人情世故、溝通技巧上，自己比較有經驗。至於會點幫徒弟助選，李月民話會發信息畀街坊。佢話自己得張欣宇一個徒弟，而張亦都得佢一個師父，「周圍認人做師父，梗係唔得啦！」
新界北候選人仲有劉國勳、沈豪傑同曾麗文。
更多港聞
相關新聞
