【Emily】管牧：陳同佳無出街 髮自己剪 自己身形fit因戒食澱粉質

【Emily】管牧：陳同佳無出街髮自己剪自己身形fit因戒食澱粉質

[2021.11.27] 發表

【明報專訊】協助台灣殺人案疑兇陳同佳(圓圖)嘅聖公會教省秘書長管浩鳴出戰立法會選委會界別，為近年少有嘅宗教界人士參選，佢噚日參加香港再出發大聯盟舉辦嘅選舉論壇。佢同Emily講，知道傳媒特別關心佢，而佢去拜會選委時都有人問佢陳同佳嘅事，佢透露陳同佳離開警方安全屋後，搬去另一度住，無出過街，甚至頭髮都唔肯出去剪，而係自己剪。

如入到立會會問6宗教嘅立場

講番近日嘅選舉工程，管牧早前同民建聯候選人一齊見選委，佢話之後都冇再拍住民記一齊去，因為選委會唔同界別都自己搞見面會，邀請候選人出席。佢又話自己出選得到香港6個宗教支持，若果當選，喺立法會面對唔同嘅議題，都會問6個宗教嘅立場，大家討論。佢形容自己係選委會界別候選人中唯一嘅社福界代表，佢喺論壇上話回歸前立法局都有委任聖公會牧師，宗教界一直喺社會服務和教育上略盡綿力，佢參選係希望新議會有新聲音。

Emily見管牧身形好fit，唔知係咪「跑選委」嘅成果呢？佢話跑選委好忙，但佢咁fit就唔係因為咁，亦都無特別做gym，而係佢冇食澱粉質好耐。唔講唔知，原來佢曾經係個體重260磅嘅大肥仔！

選委會界別有51名候選人，名單見立法會選舉網站。