【Emily】眼癌無阻求學心 視障生做政府實習翻譯
[2021.08.19] 發表
【明報專訊】政府推出「與香港同行」計劃，等參加學生有機會做影子官員，近日唔少司局長都有講吓影子局長嘅一日工作情况，好似公務員事務局聶德權噚日就同兩個影子局長去咗局內嘅法定語文事務部，了解部門工作並同視障實習同學楊展匡(Kelvin)交流。
聶德權喺fb話，港大讀書嘅Kelvin係部門今年殘疾學生實習計劃嘅實習生，主要翻譯及處理行政工作。Kelvin細個因眼癌完全失明，但佢克服過嚟，積極學習，醉心辯論、棋類比賽，亦鍾意打麻將。聶德權話Kelvin希望從事與政府政策相關嘅工作，佢祝願Kelvin日後喺不同崗位都可以發揮所長。
創科局長薛永恒噚日出席網上論壇，向韓國商界介紹香港創科最新發展與機遇，兩個「影子局長」亦坐喺隔籬觀摩呢個視像會議。環境局長黃錦星前日就同兩個影子局長，一齊同立法會議員考察環保署轄下轉廢為能等嘅設施，仲畀兩人操刀喺其fb寫感言。
更多港聞
相關新聞
