【Emily】全港約2500野豬 環署唔係靠估
[2021.08.06] 發表
【明報專訊】環保署官員上個月喺立法會環境事務委員會上，被問到點樣推算出全港有1800至3300隻野豬，署方最近以書面向立法會提交補充回覆，原來漁護署喺2019年8月已展開研究，首先喺馬鞍山郊野公園設置一批紅外線相機，自動拍攝經過嘅野豬，記錄野豬出沒，再根據距離取樣方法，以統計學分析相片數據後，得出野豬密度，再利用全港郊野公園總面積443平方公里作為全港郊野範圍，推算出全港郊野約有2500隻野豬，數目介乎1800至3300隻。
對於有議員關注野豬破壞農作物而造成嘅經濟損失，環保署回應話，收到投訴後會調查，同時會向農民提供預防野豬破壞嘅建議，例如加建圍欄防止野豬走入農田，又提到喺荔枝窩同鶴藪嘅農戶，按照漁護署建議喺農田加裝電圍網後，已有效阻止野豬破壞農作物。
更多港聞
相關新聞
