【Emily】「從一種不自由,轉到另一種不自由」 林朗彥出獄 嘆人面全非
【明報專訊】前香港眾志秘書長黃之鋒、主席林朗彥(Ivan)及成員周庭,於反修例期間因6.21包圍警察總部案被判囚,其中Ivan被判7個月,刑期較其他兩人短。Ivan本周一服畢刑期,由喜靈洲懲教所去到中環碼頭,佢噚日喺facebook出post,形容自己從一種不自由,轉移到另一種不自由;喺鐵欄內都知道有更多人被捕,出獄後發現有啲相識嘅人已經消失不見。
Ivan話喺過去兩日,真切感受到劇烈變化嘅氣氛,電話裏面嘅通訊App,都已經歷一番震盪:有啲群組喺幾個月前依然熱鬧,如今部分帳戶已經對應唔到現實中嘅真人。有中學老師寫信畀Ivan,話有至少10名老師喺過去數月選擇移民,部分人甚至教過Ivan。Ivan感嘆離開香港大概唔止發生喺政治前線,而係一般香港人身邊嘅故事。
讀書跑步打籃球 瘦咗12kg
稱未令生命變得更豐厚
回想獄中生活,Ivan話自己喺獄中讀書、跑步、打籃球,瘦咗大約12公斤(即約逾26磅),但每日嘅時光唔會為自己累積到任何嘢,唔會令生命變得更豐厚,形容呢樣係監禁最痛苦嘅地方,「監禁是非暴力且慢性的生命磨蝕」。