【Emily】曾健超有意再戰社福界 唔簽確認書
【明報專訊】立法會選舉前日展開提名期,部分人首日搶閘報名,包括社總外務副主席張志偉報名參選社會福利界,有簽署確認書。上屆參選社福界但敗北嘅九龍城區議員曾健超(Ken),有意捲土重來,佢噚日喺facebook表明會堅持抗爭意志,拒絕簽署確認書。
話民意想有堅定抗爭意志者出選
Ken話民主派初選清晰顯示,無論地區直選定功能界別,民意都希望有堅定抗爭意志嘅代議士出選,大家要嘅唔再係「溫和保守的35+」,而係「不放棄、不妥協、不退讓、不投降嘅35+」。Ken話確認書唔係選舉嘅法庭程序一部分,但簽唔簽署都有可能被DQ,佢唔認同DQ,更覺得唔可以喺呢個問題上讓步退縮,所以堅決唔簽確認書,唔承認僭建嘅程序。Ken話希望喺社福界延續抗爭意志,又話要每一個代議士都係「真·抗爭者」。
4年前社福界選舉出現5人混戰,最終邵家臻以4603票勝出;代表社總嘅葉建忠則獲3858票;曾健超有1011票;被指係建制派嘅關?煊獲1255票,前議員黃成智則有557票。