【Emily】來往中環紅磡渡輪 周日重開每程9元
[2020.06.27] 發表
【明報專訊】停辦9年嘅「中環—紅磡」渡輪航線周日(28日)重開，運輸署噚日宣布，首班船會喺當日早上7點半由紅磡開出，日後黃埔居民要去港島返工，就多個交通選擇。
復辦後嘅航線由富裕小輪營運，來往紅磡(南)渡輪碼頭同中環8號碼頭(西面泊位)，成人票價每程9元，星期一至六繁忙時段基本班次20分鐘一班，非繁忙時段、星期日及公眾假期30至50分鐘一班。
來往中環至紅磡嘅航線曾經由天星小輪營運，不過由於客量不足，2011年開始停辦，運輸署早前為航線重新招標，最終由珠江客運旗下嘅富裕小輪中標，獲批5年服務牌照。除咗中環至紅磡渡輪，富裕小輪仲會營運「水上的士」，循環行經維港5個碼頭，預計年底開始提供服務。
更多港聞
相關新聞
