【Emily】財爺話香港:許有這樣那樣的缺點
【明報專訊】2020/21年財政預算案出爐,財政司長陳茂波宣讀演辭時,話過去呢一年「風高浪急、荊棘滿途」,對所有香港人嚟講都係難忘嘅一年,去年中發生社會事件,未嚟得切梳理,突然又遇上新型冠狀病毒疫情。佢喺演辭中提到5次「社會事件」同9次「新型冠狀病毒」,但就無講係咩社會事件,並隻字不提「武漢」二字。
演辭五提去年「社會事件」
財爺噚日喺立法會或之後見記者都無戴口罩。佢話社會事件「損咗經濟、傷咗人心」,香港經濟因為過去多月嘅社會事件同新型冠狀病毒疫情受到沉重打擊,影響咗唔少市民嘅精神健康。佢喺結語話,香港仍然係充滿生機嘅土壤,「但它會種出怎樣的收成,在於我們每個人選擇播下什麼種子、如何耕耘、怎樣灌溉」,亦因為咁,所以封面揀咗土地嘅顏色。
佢認為,同喺呢片土地生活,「休戚與共、唇齒相依」,或者香港有「這樣那樣的缺點」,但仍係一個容許百花齊放嘅家園,即使理想唔同,仍希望大家擱置分歧,創造化解矛盾嘅空間,一齊推動香港向前。但財爺就無講佢眼中嘅香港缺點係乜。
今年政府仲送咗蜜蜂磁石貼(圖)畀記者,四眼小蜜蜂係陳茂波預算案嘅宣傳大使,寓意一齊努力,建設好呢個家。