【Emily】響應慳啲 楊潤雄記者會無戴口罩

[2020.02.07] 發表

【明報專訊】口罩供應緊絀，特首林鄭月娥日前話希望官員以身作則減少用量。財政司長陳茂波噚日無戴口罩見新民黨同旅遊業界代表，教育局長楊潤雄見記者時都無戴口罩，仲話呢段時間雖然多嘢做，但暫時都維持到「身體健康」。

話自覺身體無乜唔舒服

教育局噚日開記者招待會，交代復課同文憑試安排，3個官員中，得考評局秘書長蘇國生有戴口罩，楊局長同教育局常任秘書長楊何蓓茵都無戴。有記者話，見到楊局長無戴口罩，相信都係回應行政長官呼籲，問楊局長朝早見完業界，現場又有好多記者，會唔會覺得戴口罩係負責任嘅表現。

楊局長就話，自覺身體無乜唔舒服，而且同記者都有比較遠嘅距離，評估自己無需要喺噚日嘅場合戴口罩。相反，戴口罩嘅蘇國生一發言就已經「利申」自己「有啲感冒」。

更多港聞

【明報專訊】唔少區議員近日四出蒐羅口罩派畀街坊，但僧多粥少，有區議員派口罩時引起混亂被批評。東區區議員吳卓燁前日喺區內派口罩，但被指安排不善... 詳情