【明報專訊】香港眾志周庭透露，獲得日本北海道大學嘅老師邀請，去年10月開始就任北海道大學公共政策大學院嘅研究員(fellow)，為期一年。但佢話自從去年8月被捕至今，仍被法庭禁止出境，直到𠵱家都無辦法離境去日本。佢同Emily講，「連邀請我做fellow嗰位老師都無面對面見過」，話會再嘗試向法庭申請出境。
去年8月被捕 至今被禁出境
周庭喺facebook同大家分享就任北海道大學公共政策大學院研究員嘅消息，佢同Emily講，做研究員起碼都要見吓大學嘅老師、去嗰度嘅圖書館、或者開場演講，但𠵱家呢啲事全部都做唔到。周庭自被捕至今一直被法庭禁止出境，除非事先向法院申請。但佢上次向法官申請到東京同大阪5間大學演講，亦被拒絕，佢話唔知幾時先可以去海外。
周庭去年8月被警方拘捕，話佢喺去年6月21日有示威者包圍警察總部當日，涉嫌「煽惑他人參與未經批准的集結」同「明知而參與未經批准的集結」。
;)
