【明報專訊】社會近排熱烈討論「黃色經濟圈」，有網民又列表教大家分辨「黃店」。但最近教協賣賀年食品禮券時，就畀人發現當中有反修例示威者杯葛嘅美心集團，引嚟網上討論，包括工聯會前立法會議員鄧家彪同民建聯成員。

鄧家彪：可以交由工聯會賣

美心集團創辦人伍沾德嘅長女伍淑清近月多次點評香港時政，又話要「放棄香港年輕人」，令一啲反修例示威者發起杯葛美心。鄧家彪噚日喺facebook分享帖文，話教協有美心禮券賣，並且叫教協「唔使忍辱負重」，可以交由工聯會賣美心禮券。

教協：唔將運動同福利服務掛鈎

日後都想發掘更多「黃店」

Emily上過教協網站，見到教協賣嘅賀年食品禮券包含15個品牌，除咗美心集團，仲有美心旗下嘅翠園同埋東海堂。

Emily問過教協總幹事沈偉男，佢話教協賣包括美心在內嘅賀年食品禮券已經有20年以上歷史，除咗美心，教協亦都賣其他品牌禮券，包括「曾被內地媒體衝擊」嘅大班。

沈偉男又話，教協喺反修例運動堅持「五大訴求」，但唔會將運動同教協嘅福利服務掛鈎，會唔會杯葛某啲商店，由會員自己選擇。但佢話今次事件收到會員反映，希望有更多選擇，教協日後都想發掘更多「黃店」。