【Emily】人大姚祖輝任嶺大校董會主席

【明報專訊】港鐵主席歐陽伯權今年10月宣布「因冀專注其他公務」，提早辭任嶺南大學校董會主席，接班人一直未有着落，噚日政府宣布委任全國人大代表姚祖輝(圖)做主席，任期喺嚟緊1月1日生效，為期3年。姚祖輝透過嶺大發新聞稿話「對任命非常榮幸」，仲話「十分期待與嶺大師生並肩同行，再創高峰」。

Emily睇番資料，姚祖輝喺高教界都唔少履歷，例如做過浸大校董會副主席。佢9月接受中新社專訪，提及反修例運動，話覺得多數香港青年仲係「保持理性，好多人都愛國愛港」。姚祖輝仲喺訪問提到，「香港年輕人都很有活力，有些人可能因為一些原因暫時迷惑，但等他們再長大懂事了，就會明白什麼是對，什麼是錯」，叫大家畀時間年輕人。

另外，港大校長張翔都發表任內首份年報，話過去一年自己喺香港整體面對挑戰嘅時刻中完成工作，提到過去幾個月嘅社會運動，令包括港大在內嘅香港備受考驗，惟學生安全係學校優先考慮，校方一直竭盡所能為學生提供支持同埋幫助。