【Emily】本地回收廢紙 運越南製造 譚凱邦搞團購環保廁紙

【Emily】本地回收廢紙運越南製造譚凱邦搞團購環保廁紙

[2019.12.11] 發表

【明報專訊】𠵱家做區議員唔容易，除咗要關注社區爆屎渠、漏水等事務，新民主同盟荃灣區議員譚凱邦近日仲喺選區馬灣做埋幫居民團購廁紙，仲話要先嚟一場「廁紙革命」。

稱市面上八成廁紙國貨

點革命法？譚凱邦同Emily講，市面上八成廁紙都係大陸品牌，認為建立「黃色經濟圈」由生活做起，更可以響應環保。佢話得悉有一間本地回收公司，會收集廢紙送去元朗廠房處理打包，然後運往越南再製成廁紙。佢話呢間公司近期仲試做回收紙包飲品盒，所以想支持一下環保工業，認為要畀廢紙有出路，叫大家買環保再造產品，以達到環保循環經濟。

譚凱邦話，議員辦事處好適合代辦團購，建議其他新當選議員都可以諗吓。廁紙售價都唔算貴，每條30元(10卷)，每人上限買15條，買咗之後可以去佢辦事處取貨。