【明報專訊】綽號「光頭警長」嘅警署警長劉澤基喺微博嘅言論不時惹火，前日立法會議員田北辰不點名批評有公務員造謠生事、增加兩地矛盾。二人噚日隔空駁火，劉澤基話要邀請田北辰睇佢微博；田北辰就強調自己唔係針對任何人，「我作為議員，只關心制度」。 話說劉澤基日前喺微博上質疑區議會選舉有逾160萬「廢票」，政府急急公開澄清，田北辰前日喺立法會上不點名提到有公務員喺內地微博造謠。劉澤基噚日喺微博還擊，「作為香港選民，對數據中少了百多萬票作出疑問，不應該嗎？提出疑問代表在做(造)謠生事嗎？」佢又話「你(田)曾是我心目中一個十分欣賞的議員」。 田北辰不甘示弱，喺fb隔空回應，強調唔係針對任何人，所以冇點名，「但大家都好似知道我講邊個case」。對於廢票一事，田二少就話「唔係我話佢造謠，係政府個聲明話有人造謠」；強調最重要係制度同標準，舉例，之前有公務員公開發表政見，政府就話絕不接受衝擊公務員政治中立，嚴肅跟進違規，「係唔係有啲公務員得，有啲唔得呢？或者，係唔係喺香港講就唔得，喺內地平台講就得呢？」田北辰嘅言論獲唔少網民讚好，連佢阿哥田北俊亦喺留言留下3個「手指公」emoji讚吓細佬。
|
| |
| |
;)
