【明報專訊】泛民、建制議員幾個月冇喺立法會會議交鋒，噚日再碰頭有唔少火花，其中內會噚日傾到正、副主席同政務司長張建宗會面，多名議員借題發揮，民建聯葛珮帆(EQ)話好多市民擔心被「私了」、有小店被威脅，民主黨鄺俊宇呼籲建制派講嘢「小心啲」，EQ覺得係恐嚇。 事緣EQ形容香港進入「黑色恐怖」時代，市民唔支持「黑色暴徒」就會被威嚇，有人要求檢查市民手機，又有「小店被威脅唔捐錢就會『被裝修』」，要求政務司長提供方法解決。 緊隨發言嘅鄺俊宇就揶揄，EQ講緊嘅係咪「全黑色、無number嘅速龍部隊」，佢話不論「黃藍」立場嘅人都唔鍾意特首林鄭月娥，話有好多市民睇緊立法會直播，「希望建制派同事發言時都小心啲，攞番個公道出嚟」。 EQ聽到呢句隨即激動質問鄺「係咪恐嚇緊我」，其他泛民議員則高呼EQ「玻璃心」、「假學歷」，又叫EQ報警。鄺俊宇話無嘢澄清，強調自己語氣平和，「你咁樣都擔心？點樣開會呢？」民建聯主席、內會主席李慧琼做和事老，叫佢哋唔好糾纏喇。
|
| |
| |
;)
