【明報專訊】因佔中九子案被判囚8個月嘅社福界議員邵家臻前日刑滿出獄，噚日即刻返立法會，佢話相當期待返去，但返到去又覺得好陌生，因為到處都係水馬陣，覺得「使唔使呀」。佢噚日返辦公室嘅其中一個目的就係同議辦同事食飯，大讚同事呢段時間冇鬆懈、冇缺席，真係「攞命」咁。
返立會見水馬陣 感覺陌生
阿臻喺獄中瘦咗22磅，佢笑言自己𠵱家體重係77.7公斤，同特首選舉得777票嘅林鄭月娥終於有樣嘢「connect」，仲話街上竟然有政助讚佢靚仔，令佢相當愕然。
阿臻出獄翌日撞正政府宣布訂立《禁蒙面法》，佢回應時形容自己係「更生人士」，話感覺係由較細嘅監獄走去大監獄，「只有監獄先有呢啲為所欲為嘅粗暴操作」，話赤柱監獄仲好過香港。佢透露自己喺獄中寫咗70篇文，希望今年出兩本書，分別講述坐監經歷、監獄改革；以及反思社工價值，笑言下年係懲教處100周年，「要贈慶啦」。
;)
