【Emily】觀塘區議員 「三不管」地執垃圾

觀塘區議會主席陳振彬（左）同淘大區議員葉興國（右）一齊喺觀塘港鐵站附近執垃圾，佢哋背後嘅坑渠積咗好多垃圾，因為唔係食環署恒常清潔嘅地方。（何宛兒攝）

【明報專訊】區議會選舉近了，民生無小事。觀塘、黃大仙幾個區議員噚日聯同一班街坊一齊出動，去區內嘅衛生黑點執垃圾，佢哋話區內有好多「三不管」嘅跨部門管轄、非食環署恒常清潔嘅地帶，存在衛生隱患，令市民飽受蚊患、鼠患滋擾。噚日有份落手清理嘅觀塘區議會主席陳振彬話，會組織街坊義工定期落區執垃圾，亦會影相畀當局投訴，要政府解決問題。

跨部門管轄 非食環署恒常清潔

佢哋之前委託智庫喺觀塘、黃大仙社區視察同做街訪，搵到最少14個衛生黑點，喺翠屏邨一帶仲試過一次過捉到幾百隻老鼠。

淘大區議員葉興國分享經驗，該區附近後山有一塊被鐵絲網圍住嘅官地，歸地政署管轄，山坡屬路政署，山坡下嘅路面則屬食環署；該官地係「老鼠樂園」，但地政署話唔識捉老鼠，食環署就話官地佢哋唔可以掂，只可以畀指引點樣去捉老鼠。葉興國話，結果佢要聯同大廈法團組織居民義工，地政署每月開門畀義工，再由食環署職員指導義工放藥。佢批評呢啲「三不管」地方，等到食環署肯做嘢往往費時失事。

佢哋希望政府喺三不管地帶貼提示，提醒市民唔好違法棄置垃圾，由政務司長張建宗督導釐清「三不管」地帶嘅清潔責任。