【Emily】人民日報微博 一日兩圖鬧泛民

《人民日報》官方微博同微信帳號連日出post鬧泛民，其中噚日用多張前政務司長陳方安生同外國政要嘅合照，話陳太「不安生」（左圖），又話民主黨前主席何俊仁係「政壇變色龍」（右圖）。（微信截圖）

【明報專訊】內地官媒近日利用微博等平台，發布有關香港嘅評論同新聞，噚日《人民日報》分別喺官方微博同微信帳號發圖，批評前政務司長陳方安生「不安生」、民主黨前主席何俊仁係「政壇變色龍」，並用時間軸形式羅列佢哋「禍港證據」。

人民日報官方微博上載多張相，包括陳太同末代港督彭定康嘅合照，話彭定康2017年嚟香港宣傳新書，對香港事務指指點點，出席反對派嘅午餐會，陳太有一齊去；又批評陳太多次要求美國介入香港事務，例如今年3月就同美國副總統彭斯會面。另一「證據」，係本月初陳太同美國駐港總領事官員「密會」，形容「連站在扶手電梯的短暫片刻也談個不停」。

而自從6月5日後就冇再更新、有27萬粉絲嘅「香港警察」微博，前晚終於更新，內容係反修例衝突中受傷嘅高級督察黃家倫訪問。該微博話，黃家倫8月5日喺黃大仙驅散示威者期間遭襲擊，畀鋼珠射中口，門牙碎咗。黃喺訪問話「碎掉的牙是為了保衛香港而碎」。不過，相關訪問就冇出現喺警方嘅facebook專頁。