【明報專訊】登記選民人數創新高，當中唔少人循網上登記，選舉事務處噚日透露，電腦系統曾經出現技術問題，導致346宗選民登記申請未獲處理。選舉事務處向受影響市民致歉，提醒市民盡快登入「選民資料網上查閱系統」查詢最新登記資料，並呼籲受影響市民喺25日(下周日)、即公眾查閱截止前，聯絡選舉事務處。 選舉事務處月初公布臨時選民登記冊，今年新登記選民人數約38.6萬，選舉事務處噚日主動透露，喺6月14日至7月2日，約有6萬名市民透過電子平台遞交申請，其間系統曾數度出現技術問題，導致346宗經系統遞交嘅選民登記申請，未能儲存至伺服器，未獲處理及納入臨時選民登記冊內。 張國鈞叫全面審視選舉處管治 民建聯張國鈞對此表示遺憾，話處方𠵱家先公布事件，但要求申請人後日前主動向當局提供申請編號，只得3日時間係非常緊迫。佢對選舉事務處近年接連發生工作失誤深表關注，期望政府全面審視該處管治同埋服務質素，加以改善。
|
| |
| |
;)
